Stødd: 10 ECTS
Undirvísarar:
Nils Ohrt, mag.art. í listasøgu
Malan Marnersdóttir, professari í bókmentum
Endamálið við skeiðinum er at geva studentunum innlit í sambandið millum orð- og myndlist í frá aldaskiftinum 1900 til inn í 21. øld. Dentur verður lagdur á vitan um føroysku listagreinirnar, menning teirra í myndlista- og bókmentasøguligum høpi við atliti at viðurskiftunum millum listagreinirnar, føroyska samleikaskapan og altjóðagerð.
Lagt verður fyri við yvirliti yvir skaldskap og myndlist fram til umleið 1930, síðani verður meira gjørt burtur úr tíðarskeiðinum eftir 1930. Høvuðsdenturin er á tíðarskeiðið eftir 1960. Viðkomandi myndlistalig rák verða lýst, eitt nú impressionisma, ekspressionisma, kubisma, surrealisma og minimalisma. Meginparturin av skeiðinum fer til at gjøgnumganga høvuðsverk eftir Samuel Joensen-Mikines, Ruth Smith, Ingálvur av Reyni, Janus Kamban, Thomas Arge, Trónd Patursson, Edvard Fuglø, Hansina Iversen kanska fleiri við. Til at vísa á sambond millum listagreinirnar verða lisnar yrkingar eftir Chr.Matras, William Heinesen, Regin Dahl, Guðrið Helmsdal, Steinbjørn B. Jacobsen, Carl Jóhan Jensen, Sissal Kampmann og Kim Simonsen. Tóroddur Poulsen er í báðum bólkunum, orð- og myndlistamaður sum hann er. Mynda- og yrkingagreining og orðaskifti um viðkomandi yrkisbókmentir eru týðandi lutir í skeiðinum.
Próvtøkuháttur: Bundin heimauppgáva.
- Teacher: Malan Marnersdóttir
- Teacher: Nils Ohrt